النهاردة جاي اتكلم عن موضوع يهم ناس كتير أوي أو بمعنى ادق أنا مش أول واحد اتكلم فيه بس بتكلمه بمفهوم معين بحاول أوصله وبحاول أشرحه.. جاي اتكلم عن الإحباط.. ايه العلامات اللي بتظهر على الإنسان يكون فيها محبط.. ايه أسباب الإحباط وكيفية علاج الإحباط أو اليأس.. يالا بينا ندخل على الفيديو ونعرف احنا هنتكلم بالتفصيل عن ايه النهاردة...
السلام عليكم ورحمة الله وبركاته.. ازيكوا جميعا أخباركوا ايه يا رب تكونوا بخير وبصحة وبسعادة.. النهاردة جاي اتكلم في موضوع مهم جدا ويهم ناس كتير وكلنا عايشينه وبنعيشه في أوقات مختلفة في حياتنا.. نتكلم عن الإحباط واليأس.
بصوا أنا مش هقول مصطلحات معقدة بس أنا هتكلم عن تعريف الإحباط.. الإحباط هو ببساطة كدة هو الحالة اللي بيمر بها الإنسان في الوقت اللي بيحس فيه باليأس وعدم القدرة على السعادة وبيحس فيها الإنسان في الوقت ده أنه عنده عجز أو عاجز عن اتخاذ قرارات معينة في حياته وبيحس في الوقت ده أنه انسان فاشل.. وفي الحالة دي بننتقل لإيه هي الأعراض أو العلامات اللي بتبين الإحباط ده؟.
- إنك تبقى عاوز تنطوي تبقى عاوز تقعد لوحدك ومش عاوز تقعد أو تختلط بحد.
- مبتحبش تنزل من بيتك كتير.
- لو حد من أصحابك قالك نخرج هتقوله سبني شوية دلوقتي حابب أقعد في البيت.
- عدم القدرة على اتخاذ القرار.
- بتحس أنك انسان فاشل بتحس بعجزك.
- بتحس بالخوف والقلق لما تتحرك بتبقى حاسس انك مش هتقدر تنفذ حاجة زي كدة.
- انك دايما بتحاسب نفسك وتحمل نفسك مسئولية فشلك بشكل كبير.
خلينا نقول ايه الحاجات اللي سببت الإحباط أو العجز أو الإحساس بالفشل
- الأسباب دي بترجع لأن الإنسان فينا أو كتير مننا بيمر بأوقات بيحسوا بيها إن في مشكلة صعبة أوكبيرة ومش عارفين يحلوها يعني بيبقوا ماشيين في طريقهم في اتجاه معين ويحصلهم عجز في حل مشكلة معينة فبتسبب عليهم ضغط كبير لأنه مش عارف يحلها او يتخذ فيها قرار.
- من الأسباب اللي بتسبب الإحباط إن حد قريب منك وبتحبه وكان صديق ليك أو قريب منك أو قريبك أو أبوك أو أمك يحصل لا قدر الله حالة وفاة.. دي من الحاجات اللي بتسبب صدمة واحباط للإنسان.
- من الحاجات اللي بتسبب احباط ان أنت تبقى ماشي في هدف معين وبترجت نتيجة معينة في شغلك في عملك في البيزنس بتاعك وبيحصل انك متوصلش وتحقق الحاجة اللي انت بتدور عليها دي أو النتيجة اللي أنت بترجوها فبيحصلك احباط.
- من الأسباب اللي بتسببلك احباط عدم القرب من ربنا سبحانه وتعالى والإبتعاد عن ربنا سبحانه وتعالى ده بيخلي من جواك مفيش راحة نفسية أو مفيش هدوء نفسي فبيحصلك جزء من الإحباط.
- من الأسباب اللي بتسببلك احباط انك بتكون حاطط لنفسك هدف معين عاوز توصله وفي الآخر تلاقي نفسك موصلتلوش نتيجة حاجات كتير أوي ممكن نتكلم فيها.
- في أسباب كتير أوي يا جماعة ممكن تسبب للإنسان الإحباط هو بيتصور أنه ماشي في طريقه وبعد كدة بيحصله مشكلة ومن هنا بيحصله الإحباط.
طيب ازاي نعالج الإحباط ؟
أنا انسان بقيت محبط أو ظهرت عليا علامات الإحباط أو بقيت حاسس بالتحطم أو حاسس أني مش أنا أو حاسس أني مش في الفورمة بتاعتي وبالتالي انطويت بعدت متعاملتش اختلفت عملت مشاكل.. كل الكلام ده من أسباب الإحباط.. طيب أنا عاوز أعالج الموضوع ده..
- أول حاجة عشان نبدأ نعالج لازم يبقى عندك فهم نقطة معينة جدا لو أنت عاوز تعالجها الإحباط ده هو عرض يا جماعة مش هو أساس حياتك.. أنت بتبقى ماشي في حياتك الطبيعية وفجأة بتيجي عليك فترات يحصلك فيها احباط.. اذن هو شيء مؤقت.. لازم تبقى مؤمن كويس أوي أنه شيء مؤقت في حياتك مش شيء دائم وبالتالي لازم تبقى مقتنع تماما إن الإحباط ده بياخد وقته.. طيب أنا بعمل ايه؟.. بقعد أعرف ايه هي الأسباب الحقيقية اللي خلت عندي الإحباط ده.. بدرس الأسباب, اولا بفهم دلوقتي أن ده عرض وأفهم أنها فترة مؤقتة وبفهم أنها هتعدي ويبقى عندي الإرادة أني أتحرك في أني أعديها.. اذن مستسلمش.
- طيب ابدأ أعمل ايه؟.. ابدأ أشوف الحاجات اللي تخرجني من الإحباط.. من الحاجات المهمة انك تستشير ناس موثوق فيهم ناس بتحبهم ناس قريبين منك عندهم خبرة في الحاجة اللي حصلك فيها احباط أو فشل.. تقدر تسألهم ويقولولك نقاط ممكن تكون غايبة عندك.. مش بيقولك اللي على البر شاطر.. مش بيقولك اللي برا الملعب شايف أحسن من اللي جوا الملعب.. ده معناه ايه؟.. ده معناه ان اللي بيبقى واقع في مشكلة حتى لو كان أبو العريف لما يتحط تحت الضغط مبيعرفش يشوف كويس.. يعني لو دكتور طبيب و جراح عالمي ودكتور قلب وابنه ال قدر الله حصله مشكلة في قلبه استحالة يعمله العملية وميقدرش وميتجرأش لأن العواطف في الحالة دي هنا بتحركه معندوش قدرة أنه يفكر بعقل بمنطق بشكل معين يقدر ياخد بيها الخطوات اللي بيعملها مع الناس العادية.. ده معناه ايه؟.. ده معناه اننا دايما لازم نكون عارفين كويس أوي إن القريبين مننا ممكن نستفاد منهم.
- النقطة التالتة أني أقرب من ربنا سبحانه وتعالى أستعين بالله.. أبص كدة دايما أني أنمي الحتة الروحية اللي جوايا حتة المشاعر والروح اللي جوايا أنميها يبقى عندي طمأنينة وأدور على الحاجات اللي أقرب بيها لربنا استغفر ادعي أطلب ان ربنا سبحانه وتعالى يعيني في حاجة زي كدة.
- من الحاجات التانية اللي بتساعدك تخرج من الإحباط ده أنك تبقى عارف كويس أوي انك لازم تتحرك بشكل أساسي وتشتغل على نفسك يعني أنا قولت ان ممكن حد يساعدك المقربين اللي بتثق فيهم لكن برده لازم تعرف كويس أوي انك بنفسك هتقدر تخرج نفسك يعني محدش هيجي يطبطب عليك ويقولك معلش يا فلان اخرج من اللي أنت فيه وخلاص على كدة.. واللي هيعمل معاك كدة مرة مش هيعمل كدة على طول.. اذن انت في ايدك علاج نفسك.. أنت لازم يكون عندك من جواك القدرة والإرادة انك تعالج نفسك.
- من الحاجات المهمة اللي تخرجك من الإحباط التمارين يعني الرياضة الروحية, الإسترخاء, التأمل.. انك تقعد كدة تتأمل في نعم وخلق الله سبحانه وتعالى.. تتأمل الحاجات اللي في الكون اللي فيها روحانيات وطاقة ايجابية.
- من الحاجات المهمة جدا الرياضة.. الرياضة يا جماعة بتخليك تخرج كل الطاقة السلبية اللي جواك.. بتخليك تبقى عندك القدرة على انك تنفض العفار الداخلي اللي جواك اللي بيحسسك بالسلبيات.. الرياضة بتحرك الدورة الدموية.. بتنشط الجسد.. بتخليك نشط وحركي.
- من الحاجات المهمة جدا والأسباب اللي بتعالج الإحباط إنك تفكر برا الصندوق.. انك متبقاش عايش الوهم وعايش المواضيع اللي بتسببلك احباط.. لأ.. فكر في أمور تانية.. تناسى موضوع الإحباط وفكر في حاجات تانية.. انك تحط خطة لنفسك انك تستغل وقتك بشكل ايجابي وتشوف وقتك ده هتعمل فيه ايه وهتحركه ازاي وتحط خطة لنفسك تخرجك من الموضوع ده.
بصوا خليني أقولكوا الإنسان الناجح مش هيبان أنه ناجح إلا لما يكون فشل فعمل ابتكار.. ده معناه ايه؟.. ان أنت مش هيبان تطورك إلا لو حصل فشل لأنك لو بتعمل نفس الحاجة كل يوم بشكلها مش هيحصل تطوير.. طيب عشان تعمل تطوير يحصلك فشل.. عشان يحصلك فشل هتدور على حلول.. بس الإنسان الذكي والعاقل والقوي واللي عنده ارادة هو اللي يخرج من محطات الفشل دي بشكل أسرع.. ده بإختصار.
طولت عليكوا المرة دي بس يا رب يكون كلامي لمس حد فيكوا واستفاد منه وبدأ يخرج من لحظة الإحباط ومن الجو اللي عايش فيه لمواقف عملية تؤدي إلى النجاح والإحساس بالسعادة.
تحياتي ليكوا.. والسلام عليكم ورحمة الله وبركاته...
By Mohamed Elmahdy
للإستماع إلى الفيديو لهذا الموضوع اضغط هنا
لمتابعة القناة على اليوتيوب اضغط هنا
ولمزيد من المعلومات عن طرق النجاح اضغط هنا
موضوعات ذات صلة:
تنمية بشرية اضغط هنا
كل ما يخص التنمية البشرية اضغط هنا
كلام في البيزنس اضغط هنا
تطوير الذات اضغط هنا
اعرف نفسك اضغط هنا
الطاقة اضغط هنا
العلاقة بالمحيط اضغط هنا
الدعم النفسي اضغط هنا
.jpg)
