سعادتك في ايد وحزنك برده في ايدك أنت.. ازاي الكلام ده؟.. تعالوا نبدأ ونعرف ازاي.. يالا بينا...
السلام عليكم ورحمة الله وبركاته.. ازيكوا يا جماعة أخباركوا ايه.. معاكوا محمد المهدي.. ايه الموضوع اللي جايين نتكلم فيه النهاردة؟.. سعادتك في ايدك وحزنك بإيدك أنت.. ناس كتير أوي هتستغرب ازاي ده الموضوع بإيد ربنا.. طبعا كل حاجة في الدنيا بإيد ربنا لازم يبقى كلنا فاهمين حاجة زي كدة لكن اللي أنا أقصده مشاعرك.. يعني ايه؟.. يعني أنت بإيدك تسعد نفسك وبإيدك تتعس نفسك.. يعني أنت لو فكرت براحة كدة واديت لنفسك العنان انك تفكر وتركز في الكلام اللي بقوله هتلاقي ان الإنسان لو قدر يوظف مشاعره صح وقدر يوجهها صح في الإتجاه اللي يخليه سعيد هيبقى سعيد ولو بشكل لا ارادي يوظف مشاعره في الإتجاه الحزين أو التعيس فبيعيش مود التعاسة أو الحزن.
اللي بيشجع الأهلي واللي بيشجع الزمالك واللي بيشجع أي فريق كورة.. في زملكاوية لما الأهلي بيلعب بيبقوا زعلانين جدا لو الأهلي كسب والعكس الأهلوية لو الزمالك بيلعب بيبقوا زعلانين جدا لو الزمالك كسب في حين ان الأهلوية والزملكاوية أصلا أصحاب في شغل واحد, في درس واحد, في مدرسة واحدة لكن لما الأهلي يلعب والزمالك يلعب كل واحد بينتمي للي وظف مشاعره له.. وهو صغير درب نفسه أنه بيحب الأهلي فبقى أهلاوي أو الزمالك.
ده مثال بسيط جدا كل الناس ممكن تفهمه.. على كدة بتقيس حاجات كتير أوي في حياتك.. في حاجات كتير أوي ممكن تخليني زعلان أو حزين بسبب أنها بتزعلني بندرج وراها وبعيش الجو ده فهفضل طول الوقت زعلان وحزين ومتضايق ومهموم وشايل الهم.
الكلام اللي أنا بقوله ده محتاج تدريب, محتاج فهم, محتاج وعي.. ازاي أحل مشكلة الحزن.. لازم يبقى الموضوع بالنسبالي محتاج رؤية شمولية وفهم للموضوع وأبقى عاف كويس أوي أني لو قدرت أوظف مشاعري بشكل سليم وقدرت أتوجه من مشاعر الحزن لمشاعر السعادة والفرح أو لتوظيفها .. مش هتحول أو همثل أنا مبمثلش.. أنا بس بوصل لنفسي رسالة داخلية ان "قل لن يصيبنا إلا ما كتب الله لنا".. ان كل شيء في الدنيا بتقدير ربنا سبحانه وتعالى.. ان اي حاجة احنا المفروض نعيشها لازم نشوف ايه اللي نقدر نستفاده منها.. يعني أنا حصلتلي مشكلة كبيرة.. طب ايه المعنى اللي أنا حصلي فيه المشكلة دي وان ربنا سبحانه وتعالى أراد ان تحصلي المشكلة دي.. طيب ايه المغزى بقى.. لازم أدور ولازم أطلع بدرس مستفاد ولازم أوجه مشاعري في الإتجاه اللي يخليني ابقى عارف أواجه مشكلتي وأكون عندي المقدرة اني أكون هادي وأكون كمان سعيد عشان أكون قادر أحل المشكلة دي.
احنا بنتكلم في سلسلة كتيرة جدا من الأمور اللي تخلي الإنسان يقدر من خلال نفسه يبقى أفضل ويقدر يوظف طاقته صح ويقدر يستغل مشاعره بإتجاه سليم وهنفضل نكمل في الإتجاه ده لحد ماكلنا نوصل في الآخر ان يكون عندنا المقدرة اللي اجنا نتعامل مع حياتنا.
تحياتي ليكوا.. ولو حابين تتابعوني ده شيء يسعدني.. السلام عليكم...
By Mohamed Elmahdy
للإستماع إلى الفيديو لهذا الموضوع اضغط هنا
ولمتابعتنا على اليوتيوب اضغط هنا
لمزيد من المعلومات عن تطوير الذات اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
