السلام عليكم ورحمة الله وبركاته.. النهاردة هكلمكوا عن موضوع مهم جدا جدا جدا.. موضوع يفرق كتير اوي في حياتنا وممكن نفردله سلسلات كتير أوي في الحديث لإنه هو موضوع لو اتعلمناه صح وفهمناه صح ممكن يسبب النجاح لكل واحد فينا.. موضوع النسيان.. وهل النسيان نعمة ولا نقمة؟.. وهل النسيان في حد ذاته مشكلة ولا مش مشكلة؟.. وهل التذكرة والتكرار حاجة كويسة ولا حاجة وحشة؟.
ركزوا معايا كدة في موضوع النسيان ده لإنه موضوع هيفرق في حياة كل واحد فينا.. النسيان.. سيدنا موسى لو تفتكروا أنه في سورة الكهف كان في آيه لما نسيوا الحوت بتاعهم "نسيا حوتهما فأتخذ سبيله في البحر سربا".. وبعد كدة لما افتكروه قال لفتاه "أتنا غداءنا لقد لقينا من سفرنا هذا نصبا".. قال "أرأيت إذا أوينا إلى صخرة فإني نسيت الحوت وما أنسانيه إلا الشيطان".
لو تفتكروا موضوع النسيان تاني.. سيدنا يوسف لما كان مسجون في السجن ولما فسر الحلم ولما قال لحد من الشباب "اذكرني عند ربك فأنساه الشيطان ذكر ربه فلبث في السجن بضع سنين".
معنى كدة ياجماعة ان النسيان ده موجود عند البشر.. على العكس تماما "وما كان ربك نسيا" ربنا سبحانه وتعالى مش بينسى.. اذن النسيان ده صفة من صفات البشر عشان كدة في القرآن نفسه قال "فذكر فإن الذكرى تنفع المؤمنين" وقال برده في سورة يوسف "اذكرني" عشان عارف كويس أوي أنه هينسى.
طيب ناخد ايه من الموضوع ده يا جماعة؟.. ناخد ان موضوع النسيان ده موضوع على أساسه اتعملت كل الإختراعات الموجودة عندنا دلوقتي.. يعني ايه؟.. يعني الكمبيوتر ده واللاب توب ده أو التليفون ده او الأندرويد أو كل الأجهزة الموجودة.. كل ده اتعمل عشان موضوع واحد بس هو النسيان.
تعرفوا ان الإنسان عشان يكون ناجح في حياته لازم يكون عنده تذكر ولازم يبقى عارف سيستم.. اي ادارة ناجحة هي اللي شغالة على سيستم وأي نجاح في شيء هو ان أنت بتفتكروه وتشتغل عليه وبتصر على أنك تحققه.
طيب الحاجة اللي بتنساها وتروح في طية النسيان؟.. النسيان يا جماعة مشكلة مش ميزة.. في ناس بتقولك ان النسيان ميزة عشان بيهرب من مشاكله بالنسيان.. عشان بيواجه مشاكله بالنسيان.. عشان بينسى الحاجات الوحشة اللي مرت عليه في حياته فبيقولك كدة كويس أوي.. هو ممكن يكون نعمة للي معندوش القدرة على فهم مشاعره وتوجيها صح لكن اللي عنده القدرة على فهم مشاعره وتوجيها صح لازم يكون عنده لقدرة على التذكرة والتذكر والتكرار.
يعني لما يجي حد يقولك اعمل كذا يا فلان اعمل.. تقعد تقول يادي النيلة هيقعد يعيد ويزيد ونفس الكلام يقوله ويزيده وبيكرره حاجة مملة.. للأسف ده مش حاجة مملة وهي بجد حاجة مميزة.. ليه؟.. مكانش ربنا قال "فذكر فإن الذكرى تنفع".. مكانش قال اقرأ من القرآن ومتنسهوش.. مكانش كل شوية عندنا الصلاة مكررة.. مكانش شغلك كل يوم بتروحه عشان تشتغل وتعمل.. لو كان موضوع التكرار ملوش أي لزمة كان حياتنا كلها وقفت لإن في النهاية مش هنعمل أي حاجة.
جيه منين الإصرار؟.. من التكرار, جيه منين القوة؟.. من التكرار, جيه منين التحدي؟.. من التكرار, جيه منين القدرة على أنك تقع وتقف.. تقع وتقف.. تقع وتقف؟.. من التكرار.
طيب ده معناه ايه؟.. ده معناه ان كل واحد فينا يحاول يحط لنفسه أهداف يكتبها وينسقها ويرتبها ويفهمها ويستوعبها ويبدأ ينفذها ويكررها ويعيدها ويطور من نفسه فيها ويعيدها ويوصل للأفضل.
يا جماعة الناس الناجحة هي الناس اللي قررت وأصرت, والناس الفاشلة هي اللي نسيت وتجاهلت.. خلينا نكون ناجحين وندور على اننا نكرر ونجتهد ومنستسلمش ونكون افضل.
تحياتي ليكوا.. ودايما مكملين مع بعض في مواضيع كتيرة ومفيدة للجميع.. السلام عليكوا...
By Mohamed Elmahdy
للإستماع إلى الفيديو لهذا الموضوع اضغط هنا
ولمتابعتنا على اليوتيوب اضغط هنا
لمزيد من المعلومات عن تطوير الذات اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
