السلام عليكم.. معكم محمد المهدي.. هتلاقوني بسجل كل شوية خواطر.. الخواطر دي ممكن تكون موجودة وأنا في العربية, وأنا في الشارع, وانا في مكتبي, وأنا في بيتي.. بيجي في ذهني حاجة معينة وعاوز اوصلهالكوا.. بسجلها على طول وبجمعها.. هتلاقيها في مواضيع كتير خاصة بتطوير الذات, خاصة بالعلاقة بالمحيط, خاصة بطرق النجاح, خاصة بأشياء هتنفعنا وهتفدنا كلنا ان شاء الله.. وهتسمعوها دايما في كل الأوقات المختلفة اللي أنا ممكن أسجل فيها.
تحياتي ليكوا.. وأتمنلكوا سماع رسالة هادفة.. اتفضلوا...
جاتلي خاطرة كدة وأنا في زحمة عباس العقاد والإشارة.. الناس اللي بتحلم بالفرقعة..
فاكرين طبعا كلنا سمبل.. هوب.. فوق.. الحركة الشهيرة بتاعته كدة.. والناس كلها بتحلم إن فجأة تبقى مليونيرات والناس كلها بتحلم إن يبقى معاها فلوس قد كذا.
بصوا عشان بس نبقى متفقين مع بعض على حاجة.. النجاح والغنى والتخطيط والكلام ده مبيجيش إلا بالتجارب والتعلم والفهم لأن ممكن تفرقع أه بس متستمرش في الفرقعة دي.. يعني ايه؟.. يعني ممكن تبقى مميز جدا وعامل لنفسك بروباجندا بس بروباجندا لحظية.
وبالتالي الموضوع بإختصار بيقول أنك لازم تكون باني على أساس يعني النجاح مبيجيش إلا من عصارة خبرات واحتكاكات ومواقف ومشاكل.. كدة تقدر يجيلك النجاح.
ومن هنا الخبرات والمشاكل والإحتكاكات ممكن نختصرها لكن مينفعش تبقى وليدة الحظ والصدفة.. بمعنى؟.. من الممكن أنك تبقى بتتعلم من خلال مشكلة بتوقع فيها يعني خبرتك تيجي من خلال مشكلة حقيقية توقع فيها وتتخبط وبالتالي تتعلم من التخبيط ده.. طيب انا عاوز أختصر على نفسي وقت التخبيط وابقى سريع..
عشان كدة تلاقي واحد عنده ستين سنة عنده خبرة في حاجة معينة وواحد عنده تلاتين سنة عنده نفس الخبرة.. هي دي.. بس الاتنين عندهم خبرة.. طيب الفرق مابينهم ايه؟.. ده اختصر من عمره حاجة معينة فهمها بدري شوية انه قرأ خبرات الناس الآخرين وعرف ملخصات خبرات الآخرين وفهم ملخصات خبرات الآخرين فوفر على نفسه وقت من التخبيط واللخبطة وانه يقوم ويقع ويقع ويقوم, التاني اتعلم وعرف بس من الحياة واتعلم منها مجبر أوقات ومصير ومخير في أوقات أخرى.
ومن هنا اللي انا عاوز اوصله ان مفيش حاجة اسمها وليدة الصدفة تبقى نجاح كامل.. وليدة الصدفة نجاح لحظي.. لكن من الممكن أن تختصر معدل الوقت مش تختصر الخبرة.. لأ.. تختصر الوقت.. في ايه؟.. في قراءاتك, في اطلاعاتك, في فهمك.. ومن هنا تبدأ تنطلق.
من الحاجات اللي بتخلى الروح ترتقي استشعار معاني القرآن.. دي من الحاجات اللي بتعلى الروح او الجزء الروحي في الجسم.. احنا اتفقنا اننا شقين (جسد وروح), فالإستشعار للمعاني وفهم عمق المعاني دي الحاجات اللي بتعلى الروح.. عشان كدة دايما لما كنا بنسمع الشعراوي الله يرحمه كان في بعض حاجات كدة أول مابنسمعها نقول: الله. لإن المعنى بيدخل بإحساس معين ليك فروحك بتعلى أوي فمن هنا بيوصلك كلمة (الله) ان الروح عليت أوي.
تحياتي ليكوا...
By Mohamed Elmahdy
#محمد_المهدي
للإستماع إلى الفيديو لهذا الموضوع اضغط هنا
لمتابعة القناة على اليوتيوب اضغط هنا
ولمزيد من المعلومات عن طرق النجاح اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
