أولادنا امانة في ايدينا ازاي نقدر نحافظ عليهم.. يا جماعة الأولاد رزق ونعمة من ربنا سبحانه وتعالى بس في كتير مننا بيغفل عن شوية حاجات أساسية كدة مهمة جدا جدا هتفرق كتير في تربية أولادنا يا جماعة.. تعالوا نعرف ايه اللي أنا أقصده بالكلام ده وايه اللي أقصده بالفيديو ده.. يالا بينا...
السلام عليكم ورحمة الله وبركاته.. زي ماانتوا شايفين الطبيعة أنا دايما بحب الطبيعة والمكان اللي ممكن يبقى فيه فرصة اني اصور في مكان فيه طبيعة, فيه خضرة, فيه لاندسكيب بصور على طول.
احنا جايين النهاردة نتكلم في موضوع مهم أوي أوي أوي لينا .. ولادنا.. بصوا هقولكوا حاجة.. في نوعية من الأباء والأمهات بيهتموا أوي أنهم يدخلوا الأولاد مدرسة معينة وانترناشونال ويشتغلوا على موضوع التعليم, وفي نوعية تانية بيهتم انه يعلم أولاده التمارين أو السباحة أو رياضة معينة أو النادي أو الاشتراك في حاجة معينة, وفي نوعية تالتة بيقولك سيبهم يا عم هم كدة كدة هتمشي الدنيا وهيتربوا وزي الفل وربنا هو اللي بيربي من غير ماياخد بأي نوع من أنواع الأسباب اللي ربنا سبحانه وتعالى حطها للجميع.
أنا عاوز أقول علموا أولادكوا في صغرهم عشان متندموش في كبرهم.. يعني ايه؟.. بصوا يا جماعة ببساطة كل واحد فينا المفروض يبقى عارف كويس أوي أن يبقى عنده أول حاجة نفس طويل كدة وطولة بال لأن تربية الأولاد مش سهلة فلازم يبقى عندكوا اول حاجة القدرة على انكوا تصبروا عليهم.. طبعا أنا بخاطب الأب والأم مش بخاطب الأب بس ولا بخاطب الأم بس.. أه أنا عارف ان الأم في معظم الأوقات بتبقى قاعدة مع أولادها وان الأب بيبقى في شغله بس هم الاتنين بيبقى دورهم مهم جدا جدا جدا في التربية.. أول حاجة لازم يبقى هم الاتنين متفقين.. يعني ايه؟.. يعني لازم الأب والأم يكونوا حاطين أسس مابينهم وما بين بعض لتربية عيالهم.. مينفعش ده في وادي وده في وادي ومينفعش ده يقول كلام وده يقول كلام.. لازم يكون في احترام متبادل مابين الأب والأم.. لازم مفيش حد فيهم يغير الكلام قدام أطفاله.
خدوا بالكوا كويس ان الأطفال في مرحلة عمرية أصغر ماانتوا متخيلين يعني 6سنين أو 7سنين بيبدأوا يدخلوا في مرحلة تشغيل الدماغ.. بيحوروا -الكلمة الدرجة اللي احنا عارفينها-.. ممكن يوقع بابه ومامته مع بعض بسهولة جدا وانت تدخل في مشاكل كبيرة مع مراتك أو العكس هي تدخل في مشاكل معاك وهو قاصد يدخلكوا في حته تانية خالص.
1- الاتفاق.. انتوا الاتنين -الأب والأم- تحطوا قواعد تبقوا ماشيين عليها وأسس أساسية تكونوا بتحركوا ليها عشان ميحصلش مابينكوا ومابين بعض اختلاف هم يدخلوا في اللقطة دي.
2- حطوا ربنا سبحانه وتعالى دايما قدامكوا في جميع تصرفاتكوا.. دايما تحكيلهم قصص عن الأنبياء, تحكيلهم قصص عن الصادقين, تحكيلهم قصص عن الناس المحترمة نجحوا ازاي وحصلهم ايه.
3- لازم يبقى موضوع الثواب والعقاب ميبقاش بالضرب.. انسوا قصة الضرب دي.. الضرب ده عمره ما كان تربية ولا تربية سليمة ولا نشأة.. في مرحلة معينة هتلاقي ابنك اللي بتضربه ده ده بيرد عليك أو بيبجح فيك وبيهرب منك أو بيعمل حاجات كتيرة جدا من وراك وبيضحك عليك.. التربية يا جماعة بالثواب والعقاب يعني لو عمل حاجة كويسة كافئه وشوف هو بيحب ايه واعملهوله, شوف هو بيحب حاجة معينة اشتريهاله, بيحب يروح نادي معين هتوديه, بيحب يلعب لعبة معينة هتلعبه بيحب يزور قرايبه الفلانيين أو بيحب صاحبه الفلاني او نفسه في حاجة معينة تشتريهاله.. كدة.. العقاب هتحرمه من الحاجة اللي بيحبها, هتخاصمه وتزعل منه, هتتجنبه وتتجاهله ويبقى بالإتفاق لكن لازم يبقى معروف كويس أوي انك لما تعمل عقاب هتنفذه.. لازم يبقى عارف انه لو عمل الصح هيتكافيء ولو عمل الغلط يتعاقب.. يبقى عنه حب للصح لأنه بيفرح وبيحصله سعادة ويبقى عنده كره للغلط لأن بيحصله مشاكل وبيتضايق منها.
4- لازم تعلموهم يا جماعة ايه هو الصدق وايه هي الأمانة.. ايه هي انك تكون بتساعد الأخرين.. لازم تعلمهم ازاي يبقى عندهم القدرة على التعامل مع الأخرين, الجرأة, عدم الخوف إلا من ربنا سبحانه وتعالى.. لازم تعلموهم ازاي يعرفوا ياخدوا حقهم.. لازم تفهموهم شوية أمور كدة معينة.. ازاي يقدروا يتعاملوا في محيط المدرسة, ازاي يقدروا يتعاملوا في محيط النادي بتاعهم, ازاي يقدروا يتعاملوا في محيط اللي حواليهم سواء كان في الباص أو الأتوبيس أو في أي مكان مواصلات.. لازم يعرفوا يتكلموا مع الناس وازاي ياخدوا حقوقهم بأدب.
يا جماعة هقولكوا قصة بسيطة جدا عن طفلين.. الطفلين دول لأنهم متعلمين صح وصلوا الرسالة صح.. سيدنا الحسن والحسين أولاد سيدنا علي لما كانوا شافوا حد بيتوضأ غلط عملوا ايه؟.. هم الاتنين راحوا للراجل وقالولوا بعد اذنك يا عمو ممكن تشوفنا واحنا بنتوضأ وتقولنا مين اللي اتوضأ صح فقالهم ماشي اتفضلوا.. الاتنين اتوضأوا صح ميه في الميه فالراجل بصلهم وابتسم كدة وقالهم انتوا الاتنين اللي اتوضيتوا صح وأنا اللي اتوضيت غلط.
5- لازم يبقى ولادنا عارفين كويس أوي بيطلعوا ويبيكبروا وبينشأوا على أهداف في حياتهم.. متستناش وتقول لما يكبر هيتعلم.. متستناش وتقول أنا هأكلوا وأشربوا المهم أنه ياكل ويشرب وبعد كدة ادخله المدرسة وهو كدة هيبقى كويس.
استثمروا في أولادكوا يا جماعة.. استثمروا فيهم عشان هتحتاجوهم لما تكبروا.. لما تكبر وتبقى قعيد ولما تكبر وتبقى مريض أو مش قادر هو اللي هيشيلك, هو اللي هيدعيلك.. فاستثمروا فيهم استثمار سليم, استثمار صحيح.
ربنا يجعل أولادنا وأولادكوا من الأبرار بأبائهم وأمهاتهم ودايما من مطعين الله سبحانه وتعالى ويصلح أحوالهم كلهم.. نراكم على خير ويا رب دايما تبقى حياتنا للأفضل وأكيد هنتكلم تاني في موضوع الأولاد.. أنا اتكلمت دلوقتي بشكل عام بس يا جماعة أرجوكوا عيدوا الفيديو مرة واتنين وتلاتة واسنعوا التفاصيل اللي أنا قولتها دي هتلاقوا في الكلام بتاعي مغازي صغيرة جدا ممكن متكونوش واخدين بالكوا منها أول مرة لما بتسمعوه.. عيدوه تاني وكرروه هتلاقوا شوية نقط معينة استفادوا منها وابدأوا اعملوها وهنعمل حلقات تانية لأولادنا وهنتحرك بشكل أكبر من كدة ليهم لأنهم يستحقوا مننا أننا نهتم بيهم أكتر وأكتر.
تحياتي ليكوا.. والسلام عليكم ورحمة الله وبركاته...
By Mohamed Elmahdy
للإستماع إلى الفيديو لهذا الموضوع اضغط هنا
لمتابعة القناة على اليوتيوب اضغط هنا
ولمزيد من المعلومات عن العلاقة بالمحيط اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
