وكلنا عارفين في رمضان كل حاجة في الدنيا بتبقى جميلة وبتبقى حلوة.. خلونا نعرف ليه رمضان أفضل وأعظم شهور السنة.. يالا بينا...
السلام عليكم ورحمة الله وبركاته.. ازيكوا يا جماعة أخباركوا ايه يارب دايما تكونوا بخير وكل عام وأنتم بخير بمناسبة شهر رمضان.
طبعا رمضان بادئ معانا زي كل سنة اول ما بيبدأ اول يوم فجاة بتحس ان رمضان خلص.. طيب احنا جايين النهاردة نقول ليه رمضان اعظم شهور السنة؟.. عشان حاجات كتير أوي أوي أوي لا تعد ولا تحصى.. عاوزين نستغل عظمة الشهر ده وجمال الشهر ده في اننا نطلع منه في الآخر بثواب كبير أوي وعظيم اوي ودرجات كتيرة جدا من ربنا سبحانه وتعالى.. عندنا حاجات كتيرة جدا نقدر نعملها في الشهر ده.. عاوزين نعمل صدقات, عاوزين نعمل صلة ارحام, عاوزين نصلي فروضنا في المسجد كلها, عاوزين نصلي الفجر حاضر, عاوزين نصلي التراويح حاضر.
رمضان فيه أعظم يوم في العالم.. اللي هو ليلة القدر.. خير عند ربك من ألف شهر.. عاوزين نستغل ليلة القدر دي ومننسهاش ومنسبهاش ومنفوتهاش.
احنا في مارثون.. في سبق.. محتاجين عشان نبدا السبق.. الناس دايما في السبق الطويل مبيجروش بسرعة بس عندهم قدرة يجروا مسافات طويلة, وبالتالي لازم تقسم رمضان عندك إلى تقسيمات معينة تطلع منها بثوابات عظيمة زي ما سبحان الله يعني رمضان اوله رحمة واوسطه مغفرة وأخره عتق من النار.. فإحنا عاوزين نستغل الرحمات الي في اول عشر ايام ونستغل المغفرة وربنا يغفرلنا كل ذنوبنا وسيئاتنا في العشر أيام التانيين وفي آخر التلاتين يوم عتق من النار.
بالنسبة لموضوع قراءة القرآن.. احنا دايما في رمضان بنقرأ قرآن ومعظم الناس بتلاقيه افتكر القرآن في رمضان.. هو ده طبعا مش صح.. هو المفروض القرآن ده معانا طول العام وطول السنة لكن خليني اقول ان معظم الناس بيستخدموا قراءة القرآن وبيستغلوها في رمضان.
طيب أنا عاوز أقول نصيحة للي بيقرأ قرآن.. عاوزكوا تعملوا وردين اتنين.. يعني ايه.. يعني ميعادين للقراءة.. يعني لو أنت بتقرا قرآن ساعة خليها على مرتين.. نص ساعة مثلا الصبح ونص ساعة آخر النهار.. مرة بتقراها بشكل بتحسب به ختامات ومرة بتقراها بتدبر.. تدبروا القرآن.
يا جماعة موضوع تدبر القرآن ده مهم جدا جدا جدا.. ليه.. لأنك هتكتشف معاني أنت مكنتش واخد بالك منها.. دايما لما بنيجي نقرأ القرآن بنقرأ عشان نلم ختامات وعدد الختامات بنلم بيها حسنات.. طيب اعمل العدد ده واعمل خاتمة وخاتمتين واقرأ بسرعة وعد صفحات لكن اقسم النص ساعة التانين للقراءة بتدبر حتى لو مش هتعمل خاتمة في رمضان.. حتى لو هتقرأ عشر صفحات بس.. اعمل الخاتمة التانية دي حتى لو هتعملها على سنة.. المهم تستفاد بأنك تتدبر في القرآن.. التدبر في القرآن عظيم عظيم عظيم.. هتكتشفوا فتوحات كبيرة جدا وهتتفاجئوا انكوا بتشوفوا معاني لأول مرة بتسمعوها.
عاوز أقولكوا كل عام وانتوا بخير ويارب دايما نبقى مع بعض وبرده هعمل حلقات أسبوعية في رمضان مرتين في الأسبوع بنزل على اليوتيوب او على الفيس بوك بشرح حاجات تفصيلية ان شاء الله لعل أنها تفيدنا ونستعين كلنا بيها في تنمية وترقية روحنا يا جماعة لأن الإنسان جسد وروح.ز في فترة شهر رمضان احنا بنعلي الروح شوية لأننا طول السنة بنشتغل على الجسد وبنزود دنيا الجسد عندنا وبالتالي بنحس اننا بننطفي.. الإنسان عشان يكون متوازن لازم يوزن مابين الروح والجسد.. في شهر رمضان عاوزين نعلى أوي أرواحنا عشان يحصل التوازن ده باقية السنة.
يالا نشوفكوا على خير.. السلام عليكوا...
By Mohamed Elmahdy
للإستماع إلى الفيديو لهذا الموضوع اضغط هنا
ولمتابعتنا على اليوتيوب اضغط هنا
لمزيد من المعلومات عن تطوير الذات اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
