السلام عليكم ورحمة الله وبركاته.. يارب تكونوا فاكرني وعافيني.. محمد المهدي معاكوا.. انا النهاردة هتكلم معاكوا في موضوع مهم جدا وهو استنزاف الطاقة.. ايه اللي أنت بتقوله ده يا عم محمد؟.. ايه الكلام الكبير ده؟.. هو مش كبير ولا حاجة هو بس محتاج يتفهم.
كل واحد فينا عنده طاقة.. زي الكهرباء اللي بتتحط في الفيشة؟.. اه عندك كهرباء.. عندك طاقة.. الطاقة بتاعتك عبارة عن حركة.. ماهي الطاقة بتاعتك عبارة عن حركتك, عبارة عن قدرتك على الفعل.
طيب اللي أنا جاي اتكلم فيه..
أي واحد فينا جواه طاقة وجواه شحنة وجواه حماسة وجواه امكانية وقدرة على تنفيذ شيء, طيب أنا دلوقتي عاوز أعمل موضوع معين وعاوز أحقق حاجة معينة وابذل فيه طاقة.. طيب أنا هبذل فيه الطاقة ازاي؟.. هبذل الطاقة لو من الأساس اخترت الطريق الصح..
يعني أنا دلوقتي رايح اسكندرية وقدامي طريق همشيه من بدايته اتجاهين.. أنا مش عاوز أمشي وبعدين أكتشف إني روحت السلوم مش اسكندرية.. يعني اعمل ايه؟.. يعني أنت دلوقتي لو قدامك الطريقين دول ومفكرتش من الأول أنك تقرأ صح متستنزفش طاقتك غلط.. فأنت قدامك طريق هتمشيه 4 ساعات فأنت روحت الطريق ده وقولت انا تمام همشي وهجري في الطريق ده وجريت ولقيت نفسك في الآخر وصلت السلوم مش اسكندرية.. ايه اللي أنت استفدته؟.. ولا أي شيء.. هتضطر تمشي 8 ساعات تانين عشان تتحرك من السلوم لإسكندرية.. لإنك من الأول لو حددت هدفك صح.. لو وقفت كدة وعرفت الطريق اليمين ده رايح اسكندرية والشمال ده رايح السلوم... هتمشي فين؟.. هتمشي اتجاه اسكندرية اليمين.
يبقى أنا أول حاجة عملتها عشان مستنزفش طاقتي عملت ايه؟.. اخترت الطريق السليم اللي أمشي عليه.. حددت طريقي صح.. طيب أنا مشيت ووصلت اسكندرية.. لما أوصل اسكندرية أول حاجة بداية الطريق اللي وصلته كان مظبوط.. تاني حاجة هبدأ أتحرك بقى والمجهود اللي أنا ببذله.. ببذله في حاجة سليمة.. بصب في المنفعة.. بروح اشتغل وأروح المكان اللي أنا عاوزه في اسكندرية بخلص مشواري وبخلص اللي بنجزه وبتم الحاجة اللي عاوزها وهبدأ أرجع تاني.
كل واحد فينا جواه طاقة وبيبقى عنده حماسة وبيشتغل.. لو من الأساس مخترش الإتجاه السليم للحماسة دي أول ما يوصل ويستنزف جزء كبير من طاقته ولقى نفسه وصل في المكان الغلط هيحصله الإحباط.
طيب أنا عاوز ايه من الكلام ده يا عم محمد؟..
اختار طريقي صح من البداية وأحدد الهدف صح وأمشي مشواري اللي أنا رايحه لو كان اسكندرية امشيه صح عشان لما أوصل أحس اني حققت جزء من أهدافي وطاقتي راحت في مكان صح متهدرتش في مكان غلط وبالتالي ابدأ وأكمل في الإتجاه السليم.
السلام عليكوا...
By Mohamed Elmahdy
للإستماع إلى الفيديو لهذا الموضوع اضغط هنا
ولمتابعتنا على اليوتيوب اضغط هنا
لمزيد من المعلومات عن تطوير الذات اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
