السلام عليكم ورحمة الله وبركاته.. أنا محمد المهدي مدير مبيعات الشركة العربية للتسويق والخدمات العقارية.. رجعنا تاني وبنتكلم النهاردة عن حاجة جديدة في مدينة القاهرة الجديدة والتجمع الخامس.. يارب متزهقوش مني لأني ناوي أطول وأشرحلكوا كل تفاصيل التجمع والقاهرة الجديدة ربنا يدينا ويديكوا طولة العمر.
النهاردة هنتكلم عن منطقة الأحياء اللي في التجمع الخامس.. المنطقة دي لو بصينا مع بعض على الخريطة هنلاقيها في الجزء الأول اللي في بداية شارع التسعين أو شارع القطامية اللي بيسموه شارع الجهاز, والأحياء دي عبارة عن 5أحياء.
في حاجة عاوز أقولهالكوا لأن في ناس كتير مش واخدين بالهم منها وهي إن مدينة القاهرة الجديدة فيها مناطق كتير من ضمنها التجمع الخامس والتجمع الخامس هنا هي الأحياء الخمسة: الحي الأول والحي التاني والحي التالت والحي الرابع والحي الخامس.
الحي التالت لو بصينا فيه 4مناطق فيلات وفي منطقة العمارات اسمها حي 3/4 وهو دمج الحي التالت والحي الرابع مع بعض وعملوه في العمارات حي 3/4.
في الحي الخامس فيه 4مناطق فيلات وفي الحي الخامس عمارات.
زي ما اتفقنا قبل كدة إن ترخيص الفيلات وخصوصا في الأحياء عبارة عن بدروم وأرضي وأول وتاني وغرف سطح, وترخيص العمارات بدروم وأرضي و4أدوار وغرف سطح.
لأنها من أقدم المناطق في مدينة القاهرة الجديدة اللي اتبنت بشكل راقي.. هي مناطق فيلات اتبنت بشكل مميز وبشكل راقي وفيها خدمات هتلاقي حاجات مشهورة هناك في مركز خدمات الأحياء اللي أنا بشاور عليه ده.. هناك هتلاقي مولات طبية ومولات خدميه وبنوك وسوبر ماركت, ومن الحاجات المشهورة هناك هتلاقي سفن ستارز وسعودي -سوبر ماركت مشهور هناك- هتلاقي مناطق جديدة جنب مسجد الفتح.
الحي الأول والحي التاني يعتبروا أغلى حيين في الشقق يليهم الحي الخامس في الشقق يليهم الحي التالت والحي الرابع بنفس الأسعار أو متوسط الأسعار.
متوسط أسعار المتر في الأحياء في مناطق العمارات بيبدأ من 7500ج حتى 10000ج و11000ج حسب المعمول فيها, ومتوسط أسعار المتر في مناطق الفيلات للشقق بيبدأ من 8500ج حتى 12000ج و13000ج و14000ج خصوصا لو كانت حاجة على التسعين مباشرة.
أنا اديتكوا خلفية سريعة ودايما بأكد عليكوا وبقولكوا أي استفسار وأي حاجة عاوزين تعرفوها عن التجمع الخامس ومدينة القاهرة الجديدة تواصلوا معانا فورا وتحت أمركوا إن شاء الله.
تحياتي ليكوا.. والسلام عليكم ورحمة الله وبركاته...
By Mohamed Elmahdy
للإستماع إلى الفيديو الخاص بهذا الموضوع اضغط هنا
لمتابعتنا على اليوتيوب اضغط هنا
لزيارة موقعنا العربية للتسويق والخدمات العقارية اضغط هنا
لمزيد من المعلومات عن فيديوهات محمد المهدي اضغط هنا
لمزيد من المعلومات عن عقارات التجمع اضغط هنا
.jpg)
Copy Right 2018
