هو احنا ليه يا جماعة طول الوقت أو في معظم الأوقات بننتقد اللي حوالينا ومش بندور على نفسنا.. المثل المصري اللي بيقول "اللي بيته من ازاز ميحدفش الناس بالطوب".. ايه اللي أنت بتقوله ده.. تعالوا نعرف أنا بقول ايه في الفيديو ده.. يالا بينا...
السلام عليكم ورحمة الله وبركاته.. ازيكوا يا جماعة أخباركوا ايه يارب تكونوا بخير وكويسين.. احنا دايما بننتقد ودايما بنبص لبعض في أمور كتيرة أوي وأحيانا تبص تلاقي الواحد مننا عامل نفسه هو الفتك.. يعني ايه الفتك؟.. يعني هو شايف اللي حواليه ماشيين غلط وبيغلطوا وعندهم أخطاء وعندهم مشاكل.
يعني واحد شايف زميله في الشغل مثلا يعني بيشتغل الشغل بتاعه وبيعمله بطريقة معينة يجي يقوله يا عم ايه العك اللي أنت بتعمله ده وايه الغلط اللي أنت بتعمله ده الشغل اللي أنت بتعمله ده غلط.. طيب ماتاخدها بطريقة تانية.. طيب ماتيجي تنصحه أو ماتيجي تتكلم معاه بطريقة غير مباشرة.
فاكرين أيام سيدنا علي بن أبي طالب وأيام الرسول عليه الصلاة والسلام لما كان في واحد بيتوضأ غلط فعملوا ايه الغلامين سيدنا الحسن والحسين أولاد سيدنا علي وهم طفلين مش كبير وعنده وعي ومدرك وفاهم ومستوعب.. عملوا ايه؟.. ده اتكلم مع ده وقالوا بص أنا بتوضأ غلط وأنت بتتوضأ غلط.. يا عموا بص لو سمحت علينا وشوف مين اللي بيتوضأ فينا صح.. وكل واحد اتوضأ صح.. الراجل وصلتله الرسالة واتكسف من نفسه أوي وقالهم أنتوا بتتوضوا صح وأنا اللي بتوضأ غلط.. قدروا يعلموه بطريقة بسيطة وطريقة شيك وطريقة مهذبة.. قدروا يوصلولوا الرسالة بشكل عمره ماهينساه طول حياته.
يا جماعة سهل أوي إنك تجرح في حد.. عشان كدة يقولك سهل انك تكسر لكن صعب انك تبني.. طيب مانعمل الصعب عشان الصعب بنجاحه طعمه أحلى.. يعني ايه؟.. يعني ماندور على اننا ننصح, ماندور على اننا نصبر, ماندور على اننا نظبط من نفسنا منفضلش طول الوقت فاكرين اننا الأفضل وبالتالي نفرض سطوتنا على الآخرين ونفضل نقولهم انتوا مبتفهموش وطول الوقت عايش على انك أنت البريمو ومفيش حد بيفهم الا أنت وان كل اللي حواليك بطيخ وتبقى أنت مقتنع بكدة جدا في حين إن ممكن يكون التاني ده بيبصلك بإستخفاف ويقولك من جواه كدة مثلا يا عم انت متفتكرش نفسك أعلى من الكون يعني في ناس أعلى منك بكتير.. ودي حقيقة.
حتى لو وصلت لدرجة وعي معينة والإنسان اللي عنده الوعي هو اللي عنده المقدرة أنه يوصل رسالته بطريقة يحبها اللي قدامه وبطريقة تخلي اللي قدامه يستفاد منها ويحب يتعلم منك.
اتعلموا يا جماعة ازاي توصلوا رسالتكوا بشكل يخلي اللي قدامكوا حابب أنه يستقبل منك وينفذه ومش لازم رسالتك توصلها في نفس اللحظة وفي نفس الثانية ونفس الدقيقة.. اصبر عسان توصل اللي أنت عاوز توصله والنصح أحسن من النقد, وتطوير الذات وتطوير نفسك وطريقتك في انك تتكلم مع غيرك أحسن بكتير أوي من الفزلكة اللي أنت ممكن تكون شايف نفسك فيها.
يارب يكون وصلنا معلومة لينا كلنا نستفاد منها.. تحياتي ليكوا .. والسلام عليكم...
By Mohamed Elmahdy
للإستماع إلى الفيديو لهذا الموضوع اضغط هنا
ولمتابعتنا على اليوتيوب اضغط هنا
لمزيد من المعلومات عن تطوير الذات اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
