السلام عليكم.. صباح الخيرات على جميع من يسمعني.. معاكم محمد المهدي.. وانا بسجلكوا بقالي فترة وبكمل معاكوا وطول الوقت هتلاقوني قدر المستطاع في أي وقت أنا ممكن أكون متاح فيه مع شغلى.. بسجل خواطر بصوتي.. بحاول أوصل رسالة خاصة بخبراتي في الحياة بتعاملاتي اللي أنا استفدته من خلال دراستي, من خلال شغلى أو البيزنس بتاعي.. بوصله لكل اللي بيسمعوني وممكن يستفادوا منها.. ودي خواطر أنا بسجلها بصوتي ممكن تلاقوها وانا في العربية, وانا في شركتي, وأنا في بيتي, وأنا قاعد مع أصدقائي.
في النهاية.. ياريت كل اللي بيسمعني توصله رسالة هادفة يستفاد منها.. تحياتي ليكوا.. واتفضلوا...
يا صباح الخيرات.. جات في دماغي حاجة عجيبة كدة شوية محتاجة منكم تأمل تفكروا فيها.. الوقت في حياتنا اللي احنا عايشينه.. هل مرة جربتوا تحسبوا احنا بضيع قد ايه من حياتنا في اوقات مبنستفادش منها نهائي.. يعني أوقات اللي بيسموها الضلمة (الوقت البلاك اي الوقت الغير مجدي بالمرة).. هل فكرتوا قد ايه بنضيع في حياتنا في الأوقات دي اللي مش بنعمل فيها حاجة او انتاج.
يعني حد فيكوا فكر عمره نام فيه قد ايه. يعني بحسبة بسيطة اوي كدة هلفت انتباهكوا لحاجة بسيطة اوي اوي.. لو انت عمرك ستين سنة وبتنام في اليوم 8 ساعات واليوم ده أنت مبتعملش فيه اي حاجة ونايم ومبتنتجش اي انتاج.. تعرف أنت الستين سنة نايم كام سنة فيهم.. حد حسب الحسبة دي قبل كدة وخد بالوا منها قبل كدة.. الستين سنة اللي حضرتك عشتهم نمت فيهم 20 سنة.. تخيل؟.. ضاع من عمرك 20 سنة نوم.
حد بقى فينا فكر في حاجات كتيرة جدا ممكن نضيعها في حياتنا وفي أوقاتنا.. يعني حد فيكوا فكر قبل كدة في موضوع المواصلات او ركوب العربيات او الحركة او وقفتنا بس في الزحمة في اليوم, وأنت رايح شغلك في منا بياخد ساعة رايح وساعة جاي.. يعني كمان ساعتين ضاعوا في المواصلات وفي منا بياخد ساعتين وساعتين وفي بياخد 3 ساعات و3 ساعات.. خلينا نحسبها بالمتوسط ساعتين في اليوم للمواصلات.. يعني 5 سنين من عمرك في المواصلات.. انت متخيل؟.. فنتخيل كدة ال25 سنة اللي ضيعناها في المواصلات والنوم دي حاجات مشروعة يعني الشغل ده أنت مضطر تروحه والنوم ده لازم تنام عشان تكمل.. يعني 25 سنة من حياتك ضاعوا في حاجات مشروعة.. تخيل كدة كل واحد ما بينه وما بين نفسه يقول أنا بضيع وقتي في الحاجات اللي مش مظبوطة قد ايه.. تخيل بقى.. ناهيك عن حاجات كتير اوي لو اتكلمنا فيها وقعدنا نحسبها هتصعقوا وهتلاقوا نفسكوا الوقت في حياتكوا قدمتوا ايه لروحكوا وقدمتوا ايه لجسمكوا.
احنا اتفقنا قبل كدة ان الإنسان شقين جسم وروح.. الحاجات دي بتحتاج غذاء.. الروح بتحتاج غذاء روحي وفكري ومشاعر, والجسم بيحتاج غذاء طاقة وأكل وتمرينات ولياقة.. اديت ايه لجسمك ولروحك اللي هو اصلا اساس تكوينك.
فكروا في الكلام ده وتأملوه وهنتكلم كتير في الأوقات دي ازاي نستغلها وازاي يكون عندنا حسن استغلال الوقت.
صباحكم رائع ان شاء الله.. السلام عليكم...
By Mohamed Elmahdy
للإستماع إلى الفيديو لهذا الموضوع اضغط هنا
لمتابعة القناة على اليوتيوب اضغط هنا
ولمزيد من المعلومات عن طرق النجاح اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
