السلام عليكم.. صباح الخيرات على جميع من يسمعني.. معاكم محمد المهدي.. وانا بسجلكوا بقالي فترة وبكمل معاكوا وطول الوقت هتلاقوني قدر المستطاع في أي وقت أنا ممكن أكون متاح فيه مع شغلى.. بسجل خواطر بصوتي.. بحاول أوصل رسالة خاصة بخبراتي في الحياة بتعاملاتي اللي أنا استفدته من خلال دراستي, من خلال شغلى أو البيزنس بتاعي.. بوصله لكل اللي بيسمعوني وممكن يستفادوا منها.. ودي خواطر أنا بسجلها بصوتي ممكن تلاقوها وانا في العربية, وانا في شركتي, وأنا في بيتي, وأنا قاعد مع أصدقائي.
في النهاية.. ياريت كل اللي بيسمعني توصله رسالة هادفة يستفاد منها.. تحياتي ليكوا.. واتفضلوا...
السلام عليكوا.. صباح الخير يا جماعة.. أنا داخل على دور برد وسخونية عشان كدة جاتلي خاطرة حبيت أقولها للجميع.. أنا بليل دخل في جسمي هوا كدة جامد فرعشني.. كنت على طريق مصر اسكندرية الصحراوي.. فجأة كدة جسمي اترعش وتعبت فأفتكرت دور برد جالي كدة عارفه بيجيلي من سنين على مدار حياتي كدة لو جالي البرد بسخونية بيحصلي مشاكل كبيرة جدا جدا جدا وببقى تعبان مش قادر أتحرك.
المهم فعشان ألحق نفسي روحت واخد حقنة.. رجعت على الصيدلية بعدها بساعتين اخدت حقنة مضاد حيوي وحقنة مسكنة وطبعا عرقت واتبهدلت وطول الليل عرق وكدة.. أنا الموضوع ده لما كان بيجيلي وأنا صغير كنت بخترف يعني.
الموضوع اللي عاوز أقولهولكوا او الدرس المستفاد أو الخاطرة اللي جاتلي.. يا جماعة دايما لو أنت عندك او عاوز تكسب أي صراع أو أي معركة سواء مع المرض أو سواء مع أي حد بتتعامل معاه لاوم تبقى أنت فوقيه..
يعني ايه؟.. يعني لو أكتشفت أو قبل مايكون عندك المرض او لو اكتشفته خش على طول عالجه خليك أنت اللي فوقيه.. بالظبط هشبهلك زي حاجة كدة.. يعني أنا التفسير اللي جالي.. ايه اللي حصل؟.. ان أنا الفيروس هيتملك مني روحت واخد مضاد حيوي وأخدت مسكن عشان أوقفه.. بالظبط هو طالعلي من الدور الأرضي لو أنت في عمارة وفي الدور التالت مثلا.. هو لو طلع السطوح عندك يبقى هو اللي سيطر خلاص على الموضوع.. وأي حد فوق الحاجة هو اللي بيسيطر عليها.. فو طالع عندي وأنا روحت مقابله من الدور التاني روحت خابطه بعصاية راح واقع على الأرض ودلوقتي هو مدروخ.
اني بعد العلاج ده ب12 ساعة أخد حاجة تانية حبوب مثلا للرشح وللكحة وبعد 12 ساعة تانين أخد مضاد حيوي تاني فيبقى الفيروس حاسس اني انا اللي سيطرت عليه كل مايجي يطلعلي الدور التاني أروح خابطه بالعصاية وهو بيلف حوالين العمارة بيتسلل أروح خابطه.
تفتكروا "غزوة أحد" اللي الرسول صلى الله عليه وسلم سيدنا محمد اللي اتهزم فيها كان بسبب ايه؟.. ان الرومان نزلوا من فوق الجبل.. سيدنا خالد ابن الوليد طول ماهو كان قاعد وعامل رقابة وهم فوق الجبل مكانش قادر يلف ويحاصرهم في الوادي.. اول مانزلوا حصل ايه؟.. سيطروا على المعركة.
كل حاجة في حياتنا نركز كدة.. لو اصطدناها من فوق يبقى احنا مسيطرين عليها.. لو هي طلعت فوقينا يبقى هي اللي مسيطرة علينا.. دايما خلينا راكب الشيء أنت اللي فوقه لو هو اللي ركبك لو هو اللي بقى فوقيك.. شكرا.. فلو عاوز تهزم اي شيء خليك فوقيه لإنك أنت اللي ليك اليد العليا.. لو اتعكست الآية ضيعت سبب نصرك.
صباح الخير عليكوا.. وتحياتي للجميع.. السلام عليكم...
By Mohamed Elmahdy
للإستماع إلى الفيديو لهذا الموضوع اضغط هنا
لمتابعة القناة على اليوتيوب اضغط هنا
ولمزيد من المعلومات عن طرق النجاح اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
