بيقولك لما تكون متميز يبقى الموضوع هيفرق معاك.. كن متميزا وتاكد أنك ستنجح.. هو ده موضوعنا النهاردة اللي جايين نتكلم فيه.. يعني ايه أكون متميز وازاي بالتميز ده هكون أكثر ايجابية وأكثر تميز فيمن حولي.. يالا بينا نعرف ازاي نشوف الموضوع ده ايه قصته بالظبط.
السلام عليكم ورحمة الله وبركاته.. في اشراقة يوم جديد والشمس ضاربة في وشنا كدة وحمام السباحة ورانا والنافورة شغالة والهوا جميل في مكان الطاقة فيه دايما بتتجدد يعني الحاجات اللي فيها طبيعة دي بتجدد الطاقة.. الطبيعة, الخضرة, البحر, المياه بتجدد الطاقة.
أنا جاي اتكلم النهاردة عن موضوع انك لازم تكون متميز والتميز ده مش هتعرف تكون متميز الا لما تمشي على شوية قواعد معينة أو شوية ضوابط معينة تميزك عن غيرك.. بصوا يا جماعة في الحياة اللي احنا عايشين فيها دي ناس كتيرة أوي موجودين في الدنيا في منهم اللي بيطلع وبيرقى وبيوصل لمرتبة عالية في الحياة وفي منهم اللي بيفضل واقف في مكانه مبيتحركش.
في بيت شعر قريته زمان بيقولك "وما نيل المطالب بالتمني ولكن تؤخذ الدنيا غلابة", بيت شعر تاني "ومن لا يحب صعود الجبال يعش أمد الضهر بين الحفر".
فعشان تفوق وترتقي ويبقى ليك وجود لازم يبقى عندك تميز.. التميز ده مهارات يا جماعة.. قريت مرة قبل كدة أن المهارات الشخصية بتبقى 90% من الإنسان والمهارات المكتسبة بتبقى 10% ده معناه ايه؟.. ده معناه ان اي تعلم في الدنيا انت ممكن تتعلمه يعني لو أنت عاوز تتعلم تسويق, ادارة, صانعة دي كلها مهارات تقدر تتعلمها من خلال دورات وكورسات وتقدر تتعلمها من خلال قراءات واطلاعات لكن مهاراتك الشخصية بتفرق أوي أوي أوي في الموضوع وبالتالي محتاج يبقى عندك قدرة عالية أوي في مهارتك الشخصية انها تزيد.. مهارتك الشخصية اللي هي ايه؟.. مهارة الفعل, مهارة الحركة, مهارة النشاط, مهارة التكرار, مهارة عدم اليأس, مهارة القوة والقدرة على التعايش مع الشيء.
الحاجات دي بتخليك شخص متميز فلازم تبقى عارف كويس أوي إن التميز مهم.. مهم أنك تكون متميز.. طيب أنا هتميز ازاي أو ايه الحاجات اللي تميزني.. في حاجات يا جماعة احنا غافلين عنها كتير اوي وهي ممكن تكون بتميزنا.. موضوع القراءة اخباره ايه معاك.. بتقرأ ولا مش بتقرأ, موضوع الدورات والتنمية البشرية اللي عندك او اثقال مهاراتك الشخصية أخبارها ايه.. بتزود مهاراتك ولا لا.. هل كل واحد فينا بيقرأ يوميا على الأقل عشرين دقيقة.. عشان تكون متميز لازم تطلع على خبرات الأخرين ولازم تعرف.
خد بالك انت لما تقرا هتوفر على نفسك وقت كبير جدا لأنك هتتعلم من خبرات ناس تانية قبلك وقعوا في غلط معين ونقلولك خبراتهم وبالتالي الموضوع محتاج منك أنك تعرفها.. هتعرفها من خلال اطلاع, من خلال قراءة.. أنت بتتميز ولا مش بتتميز.. بتتميز بقربك من ربنا.. هل انت قريب من ربنا فعلا.. هل بتعمل أعمال بتخليك قريب من ربنا.. هل بتبعد عن المعاصي.
الموضوع ببساطة انت بتتميز بإيه.. دور على الحاجات اللي بتخليك متميز وبالتالي لما تكون متميز هتقدر تحقق كل اللي انت عاوزوه.. التميز مش بيجي من يوم وليلة بيجي نتيجة ثقل, نتيجة عمل, جهد, تعلم خبرات, قراءات واطلاعات.. كل الحاجات دي يا جماعة بتخلينا مميزين.
خدوا بالكوا انا مش بقول مرسل لمجرد انكوا تسمعوه وتقولوا الله ده بيقول كلام مترتب وحلو ورا بعضه.. لا أنا بقول كلام محتاج فعلا مننا فعل.. لو عاوز توصل لشيء سهل جدا إنك تتكلم لكن الفعل هو اللي بيحقق نتيجة الشيء ده.. الشيء الصعب لا ينسى والشيء السهل بينسى بسهولة.. الصعب انك تحفر عشان كدة بيقولك التعليم في الصغر كالنقش على الحجر.. طول ماأنت بتتعلم وطول ماأنت بتثقل هتلاقي نفسك بتنقش على الحجر ومش هتنساه الكلام ده.
خليني أقولكوا يا جماعة انك لازم تكون متميز.. كله في مجاله, في موقعه, في بيته, عمله, شغله.. والتميز بيجي بالقراءة والاطلاع, بالخبرات, بالفعل, بالعمل, بالتمرين, بالتدريب, بالتكرار.. كونوا متميزين حتى تصلوا لما ترغبون.
تحياتي ليكوا.. ودايما ان شاء الله في حب وتبادل خبرات ومنفعة لبعض.. السلام عليكم ورحمة الله وبركاته...
By Mohamed Elmahdy
للإستماع إلى الفيديو لهذا الموضوع اضغط هنا
لمتابعة القناة على اليوتيوب اضغط هنا
ولمزيد من المعلومات عن طرق النجاح اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
