الحاجات المهمة والأساسية في حياة كل واحد فينا انه يكون مركز.. أنا النهاردة جاي اتكلم على نوع جديد من التركيز بس محتاج انكوا تستوعبوه كويس أوي يا جماعة لأن في كتير مننا ممكن يفهم كلامي غلط.. أنا جايلكوا النهاردة اتكلم عن حاجة اسمها "ركز على نفسك".. يالا بينا ندخل نشوف أنا هتكلم في الموضوع ده في ايه بالظبط وايه الحاجة المهمة اللي أنا هتكلم فيها لأن ده موضوع مهم جدا في حياة كل واحد فينا.. يالا بينا...
السلام عليكم ورحمة الله وبركاته.. معاكوا محمد المهدي.. يارب تكونوا بخير وأرجوا إن تكون حياتكوا دايما أفضل وتتحرك للأفضل.. النهاردة أنا هتكلم في موضوع شائك شوية ممكن الناس تفهموا مني غلط بس أنا عاوزكوا تفهموه صح.. أنا بتكلم على التركيز على النفس.
بصوا يا جماعة أنا مش بطلب منك إنك تكون أناني عشان بس تبقى فاهم الكلام رايح فين وجاي منين أنا مش بقولك ركز على نفسك إنك تكون انسان أناني.. كتير مننا بتحصله مشاكل في حياته وضغوط عليه وأحيانا بتوصل الضغوط دي للحظة كدة هو مش فاهم يعمل ايه أو مش عارف ايه اللي بيتم وأحيانا بتبقى المشاكل عنده يكون مش فاهملها سبب.. ده لأنك مشتت نفسك.. لأنك مركز في حاجات كتير.. أحيانا بيبقى عصب عنك بشكل تلقائي شايف مشكلة بتمر بيها دي مش بإيدك حلها .. حاجة تخص البلد بشيء معين وأنت مش في ايدك حلها.. حد بيعمل حاجة غلط في اتجاه معين وأنت متعرفوش ولا على علاقة وطيدة به عشان تغيرة.. وبالتالي بتشيل هموم كتير أوي والهموم دي بتبقى بالنسبالك عبء وتلاقي نفسك بعد كدة مش عارف تعمل ايه.
انفض عن نفسك غبار ما لا تستطيع حله.. هو ده كلامي.. يعني انت النهاردة في حاجات برا ارادتك مش بتاعتك مش ملكك مش بإيدك مش في حساباتك هتعمل ايه.. مش هتقدر تغير الكون ولا هتقدر تغير براك.. أنت النهاردة مسئول عن ما يخصك بشكل مباشر وما يخص من حولك بشكل وتاثير مباشر.. يعني انت مسئول عن نفسك أولا.. مسئول انك تركز على نفسك, على طموحاتك, على أفكارك, على مبادئك, على شغلك, مسئول انك تركز على من يحيطك.. تركز على أهلك, أسرتك, زوجتك أولادك, تركز في شغلك اللي بتشتغله اللي أنت متخصص فيه واللي أنت عاوز تطوره وتنميه.
في حاجات تانية بتشيل نفسك هم وعبء أنت مش قادر تشيله أو أنتي مش قادرة تشليه لما تكوني بتركزي في تفريعات وتلاقي نفسك حد طلب منك حاجة وانتي مش قادرة تعمليها أو بتعمليها عشان متزعليش فلانة او فلان فبتبقي ضاغطة وشايلة هم.
في حاجة اسمها ترتيب الأولويات.. في حاجة اسمها أنا ايه أولوياتي؟.. بنخسر حاجات كتيرة عشان مش عارفين نرتب أولوياتنا.. بنخسر حاجات كتيرة عشان بنقول حاضر في الوقت اللي مينفعش نقول فيه حاضر وبنقول لأ في الوقت اللي مينفعش نقول فيه لأ.
فأنا ترتيبي وهدفي من الفيديو ده بشكل واضح وبشكل مفهوش أي لبس.. كلمة احنا بنستجلب لنفسنا ايه؟.. احنا بنركز على ايه؟.. ماهو طول ما أنت بتركز في الحاجات السلبية هتلاقي هي اللي تطلعلك وطول ما انت بتركز في الحاجات اللي بتشتتك هتلاقيها بتظهرلك وطول ما انت بتركز في الحاجات اللي بعيدة عنك ومش في أولوياتك هتلاقي نفسك بتتلغبط وشايل طول الوقت هم وأنت مش عارف أنت شايله ليه.
ركز على الحاجة اللي تساعدك.. ركز واعرف كويس أوي انك محتاج تركز على الحاجة اللي تخليك ايجابي, اللي تسببلك سعادة, اللي تخليك من جواك مبسوط, عندك رضا لأنك بتحقق أهداف.. لو ركزت على حاجات مش بتعرف تحقق فيها نتيجة هتلاقي نفسك محبط.. ركز على الحاجة اللي تديك نتيجة.. ركز على الحاجة اللي تخليك حاسس بسعادة.. ركز على اللي يخصك.. ركز على اللي له أولويات عندك واعرف كويس اوي انك لو حققت نتيجة من الحاجة اللي في ايدك واللي انت ماسك خيوطها هتحس إن أنت لك قيمة وهتحس إن الموضوع بالنسبالك أفضل بكتير.
سريعا كدة حبيت اتكلم عن النقطة دي وأرجو انها تكون وصلتكوا ولمست حد بعينه عشان تفرق معاه.. هدفي دايما إن كلامي مش هيوصل لكل الناس وكلامي مش كله هيسمعه وكلامي مش هيأثر في كل اللي بيسمعه.. ده في ممكن حد ينتقدني لكن أنا بحاول أوصل لحد معين كدة سمع الفيديو ده لمسته حتة حاول يتحرك فيها جزء معين في حياته وصل واتحرك للأفضل.
تحياتي ليكوا ودايما مع بعض.. والسلام عليكم ورحمة الله وبركاته...
By Mohamed Elmahdy
للإستماع إلى الفيديو لهذا الموضوع اضغط هنا
لمتابعة القناة على اليوتيوب اضغط هنا
ولمزيد من المعلومات عن طرق النجاح اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
