السلام عليكم.. صباح الخير مع اشراقة يوم جديد.. محمد المهدي.. مدير مبيعات الشركة العربية للتسويق والخدمات العقارية.. بتكلم معاكوا النهاردة في موضوع كان في حد شاف الفيديوهات وبعت كومنت بيسأل كيفية حجز أراضي المغتربين أو العاملين في الخارج.. فأنا بشرحلكوا النهاردة ازاي كل واحد شغال برا مصر أو عامل برا مصر يحجز أرض موجودة في مصر؟.
مبدأيا الدولة بتنزل في مناطق كتير جدا موجودة زي التجمع الخامس, زايد, أكتوبر, مدينة بدر, دمياط الجديدة.. المدن الجديدة يعني والتجمعات الجديدة زي مدينة السادات.. أراضي بيسموها بيت الوطن ونزلتها على مراحل كتيرة أولى وتانية وتالتة ورابعة وخامسة ولسة منزلين مرحلة اسمها المرحلة السادسة.
أخر أرض نزلت بس اتحجزت خلاص كانت في امتداد النرجس في التجمع الخامس وكانت في أكتوبر برده.. في حتة مفتوحة دلوقتي لو حد حابب ينزل أو يحجز عليها اسمها جنوب السويس أو شمال الحي الأول.. طيب ازاي احجز الأرض دي..
مبدأيا موقع الهيئة لو أنت هتحجز أرض للعاملين بالخارج أو المغتربين مش بيفتح إلا من خارج مصر.. يعني ايه؟.. يعني أنت لازم تكون من برا مصر وتفتح موقع هيئة المجتمعات العمرانية وتدخل على أيقونة أراضي المغتربين أو العاملين بالخارج وبيتفتحلك الأكونت عادي وبتبص على قطع الأراضي المحجوزة.
لما بتبقى عارف إن الحاجات دي معروضة بتبدأ تبعت فلوس.. أول حاجة بتعملها بتحول فلوس على البنك المركزي بالدولار بما يعادل ربع قيمة الأرض.. يبقى أنت لازم تكون عارف الأرض بكام المتر نازل فيها.
المتر كان نازل ب7700ج في امتداد النرجس ونازل دلوقتي في جنوب السويس ب6600ج تقريبا.. بتشوف ما يعادل قيمتها بالدولار للسعر الحالي وبتحوله للدولار وبتضرب إجمالي المساحة وتعرف إجمالي التمن قد ايه وبتدفع ربع تمن الأرض وبتدفع 1% رسوم ومجلس أمناء مثلا.. بعد كدة بتحول الفلوس دي على برا على البنك المركزي وبيجيلك بعد كدة تأكيد إن الفلوس بتاعتك سمعت.. بتدخل على الموقع وتبص على الأرض وتحجز الأرض اللي أنت بتختارها لإنها بتبقى مفتوحالك المواقع والإختيارات وبعد كدة بيجيلك تأكيد حجز للأرض دي ويبقى أنت كدة حجزتها.. بتفتح الموقع بتلاقي برينت يديلك الفلوس المقدم اللي أنت دفعته ويديلك متبقي عليها قد ايه والأقساط.
وبعد كدة بتقسط باقية الأرض دي بالدولار على 5سنوات بأقساط متساوية بتبدأ مع استلام الأرض.
أرجو إني أكون وضحت الصورة للي سئلوا السؤال ده وكل اللي حابين يحجزوا أراضي ولو في أي استفسار تاني أو حاجة موضحتهاش ياريت تسألوني.
واتشرفت بيكوا.. وصباح الخير ودايما مع بعض.. السلام عليكوا...
By Mohamed Elmahdy
للإستماع إلى الفيديو الخاص بهذا الموضوع اضغط هنا
لمتابعتنا على اليوتيوب اضغط هنا
لزيارة موقعنا العربية للتسويق والخدمات العقارية اضغط هنا
لمزيد من المعلومات عن فيديوهات محمد المهدي اضغط هنا
لمزيد من المعلومات عن عقارات التجمع اضغط هنا
لمزيد من المعلومات عن أراضي بيت الوطن اضغط هنا
.jpg)
Copy Right 2018
