هنتكلم النهاردة في موضوع مهم جدا وخصوصا مع دخلة عيد الأضحى المبارك أعاده الله علينا وعليكم بالخير واليمن والبركات.. هنتكلم عن صلة الرحم.. قد ايه الموضوع ده مهم.. يالا بينا سريعا ندخل نتكلم في الموضوع ونعرف هنقول عنه ايه.. اتفضلوا...
السلام عليكم ورحمة الله وبركاته.. أخباركوا ايه يا جماعة وحشتوني يارب تكونوا بخير دايما وبصحة وبسعادة.. احنا النهاردة بنسجل وخلاص فاضل حوالي يومين أو تلاتة بالكتير وندخل على عيد الأضحى المبارك علينا وعليكوا ان شاء الله يا جماعة.. بتكلم النهاردة عن موضوع مهم جدا جدا جدا اتذكر كتير في آيات في القرآن واتذكر في أحاديث كتير من الرسول عليه الصلاة والسلام.. صلة الرحم.
صلة الرحم يعني بوصل عيلتي.. يعني أنا ليا أب وليا أم وليا أخوات وليا أقرايب.. ولاد عمة, ولاد خالة, خالاتي, أعمامي, عماتي, خلاني.. كل دول بوصلهم.. لازم يبقى في مابيني ومابينهم علاقة ترابطية.. الرسول عليه الصلاة والسلام حثنا كتير على الكلام ده واتكلم في الموضوع ده في أكتر من حديث هحاول أذكرلكوا منهم أحاديث أو بعض منها.. غير كدة نزلت آيات في القرآن بتحث على الموضوع ده.
احنا داخلين على عيد الأضحى يا جماعة.. كل واحد فينا اللي قاعد في مكان واللي قاعد في منطقة أو حتة بيشتغل فيها مبيكونش قاعد في القرية أو البلد أو المركز الرئيسي بتاعه في عيد الأضحى بينزل عشان يدبح أو يزور أقرايبه ويشوف الناس اللي مبيشوفهمش بقاله كتير.. جميل جدا وأنت رايح تزور أقرايبك انك تبقى مجدد النية عشان تبقى عارف قد ايه الثواب العظيم اللي بتاخده وأنت رايح وفي نفس الوقت تعرف قد ايه ربنا سبحانه وتعالى ممكن يساعدك ويرزقك ويفيدك.. قد ايه صلة الرحم مهمة وقد ايه قطع الرحم شيء مضر جدا.
يعني مثلا عن أبي هريرة رضي الله عنه قال.. قال رسول الله صل الله عليه وسلم: "من سره ان يبسط له في رزقه وأن ينسأ له في أثره فليصل رحمه" صدق رسول الله صل الله عليه وسلم.. يعني اللي نفسه ربنا سبحانه وتعالى يبسط رزقه والناس تفتكره بشكل جميل وشكل رائع فليصل رحمه.. يعني تخيلوا صلة الرحم قد ايه مهمة وقد ايه الرسول عليه الصلاة والسلام ذكرها .
في أحاديث تانية عن الرسول صل الله عليه وسلم قال "لا يدخل الجنة قاطع رحم".. ياااه قد ايه الموضوع مهم يا جماعة.ز قد ايه صلة الرحم مهمة.. يعني ميدخلش الجنة اللي بيقطع رحمه؟.. أه.. ليه؟.. لأن قطع الأرحام دي شيء سيء جدا.. شيء مش كويس خالص.. ازاي يبقى ليك عيلتك وأهلك وناسك وتقطع رحمك.. ازاي متصلش رحمك.. ازاي متبقاش قريب من أهلك.. ازاي متبقاش قريب من أبوك وأمك لو موجودين وأخواتك.. الموضوع ده مهم جدا يا جماعة اننا نفكر فيه بشكل حقيقي.. في كتير مننا أغفلوا.. يعني تخيل سبحان الله عن أبي هريرة رضي الله عنه قال.. قال رسول الله صل الله عليه وسلم "من كان يؤمن بالله واليوم الآخر فليصل رحمه" صدق رسول الله صل الله عليه وسلم -رواه البخاري- يعني تخيل لحد انك تؤمن بالله وباليوم الآخر فليصل رحمه.
يعني دي أحاديث أو بعض من أحاديث صلة الأرحام.. ده في حاجات كتيرة جدا.. يعني في آية في سورة الإسراء.. اعوذ بالله من الشيطان الرجيم "وقضى ربك ألا تعبدوا إلا اياه وبالوالدين احسانا إما يبلغن عندك الكبر أحدهم أو كلاهما فلا تقل لهما أف ولا تنهرهما وقل لهما قولا كريما واغفر لهما جناح الذل من الرحمة وقل رب ارحمهما كما ربياني صغيرا".. شوفت قد ايه ربنا سبحانه وتعالى أمرك في التعامل مع أبوك وأمك.
أيه تانية بتقول ايه في سورة محمد.. أعوذ بالله من الشيطان الرجيم "فهل عسيتم ان توليتم أن تفسدوا في الأرض وتقطعوا ارحامكم, أولئك الذين لعنهم الله فأصمهم وأعمى أبصارهم".. على النقيض.. شوفت صلة الرحم بتاخد ثواب عظيم قد ايه وقطع الرحم بتاخد جزاء وعقاب رهيب قد ايه.
بصوا يا جماعة أنا جاي بس بفكركوا.. كتير مننا أوي سمع الموضوع ده وكتير مننا عارفينه وكتير اوي فهموا يعني ايه صلة الرحم ومش أنا أول واحد هكون بتكلم عنه لكن أنا بحاول أوصلكوا رسالة بسيطة جدا جايز تلمس قلوبكوا أو تلمس قلب أي حد منكوا.. لو في خلاف بينك وبين أخوك, مابينك وبين أبوك, مابينك وبين حد من أقرايبك.. جيه فرصة حقيقية إنك تزيل الخلاف ده.. جه عيد من العيدين الأساسيين للمسلمين.. عيد الأضحى.. روح وابدأ وخيركم من يبدأ بالسلام.. روح صالح اعمل صلة رحم.
يا جماعة قد ايه الموضوع ده مهم وقد ايه الموضوع ده احنا بنحتاجه في حياتنا وقد ايه الموضوع ده بيسبب رزق لينا أو قطع رزق.. أحاديث الرسول قالها وآيات نزلت في القرآن من ربنا سبحانه وتعالى.. عاوزين نستفاد من الكلام ده ويارب أكون قدرت أوصلكوا رسالة توصل لقلب حد فيكوا لو في قطع رحم يلحق يوصله لو في صلة رحم يجدد نيته عشان ياخد ثواب عظيم وثواب أكبر.
تحياتي ليكوا.. والسلام عليكم ورحمة الله وبركاته...
By Mohamed Elmahdy
للإستماع إلى الفيديو لهذا الموضوع اضغط هنا
لمتابعة القناة على اليوتيوب اضغط هنا
ولمزيد من المعلومات عن العلاقة بالمحيط اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
