الموضوع ده هيهم ناس كتير وناس كتير حابة نتكلم فيه.. ايه هي المشاكل اللي بتواجهنا في شغلنا؟.. كل الناس بتشتغل وكل الناس عندها البيزنس بتاعها سواء الشخص ده موظف او مدير أو عامل أو أي كرير في الشركة اللي شغال فيها.. ناس كتير بتواجهه مشاكل كتير في شغلها وبيبقوا نفسهم يدورا على حلول.. خلونا نتكلم عن أنواع المشاكل وعن الحلول اللي ممكن نتعامل بيها في وسط مشاكلنا في شغلنا.. تعالوا بينا نعرف المشاكل والحلول.. اتفضلوا...
السلام عليكم ورحمة الله وبركاته.. وأنا في ضوء الشمس كدة وفي انعكاس الشمس والساعة حوالي 4:30م أو 4:45م وورايا البحر بجماله ومنظره حضرتني فكرة الشغل.. ناس كتير جدا أو تقريبا معظمنا بيشتغل.. خلينا نسبنا من شغلنا كالطالب.. خلينا نتكلم في الشغل أو البيزنس العادي.. اللي شغال في مصنع, اللي شغال في شركة, واللي شغال في كرير معين في شركة مالتي ناشونال سواء كنت موظف, سواء كنت مدير, سواء كنت عامل, سواء كنت أوفيس بوي بتواجهك مشاكل كتير.. سواء كنتي بتشتغلي إي ماركتينج, سواء كنتي بتشتغلي سيلز, سواء كنتي بتشتغلي في الشركات المالتي ناشونال, سواء شركات البترول أو ما إلى ذلك.. كل دي أنواع شغل.. كلها بتربطها حاجات واحدة معروفة ومتعارف عليها.
يعني مثلا هتلاقي الغيرة موجودة في الشغل مابين البنات وبعضهم او الزميلات وبعضهم أو حتى الشباب وبعضهم في غيرة, هتلاقوا دايما في كل شركة حاجة اسمها عصفورة.. كلمة عصفورة دي انتوا فاهمين أقصد ايه.. اللي هو المبلغاتي, اللي هو بيوصل , هتلاقي في كل شركة اللي هم الرباطية.. اللي هي شلة أو شلتين أو تلاتة بيعملوا رباطية.. هتلاقي في شركات فيها مدير متسلط.. مدير شايف نفسه وحاسس أنه مفيش حد غيره ومفيش حد موجود في المكان ده إلا هو وكله لازم يسمع كلامه, هتلاقي رئيس مجلس الإدارة أو أي مدير تاني عينه زايغة, في زميل في الشغل حابب يعمل براشوتات وتلاقيه بيغلس على دي ويغلس على دي, هتلاقي النمامين اللي بيتكلم على ده وفي سيرة ده.
الحاجات دي الناس اللي بيشتغلوا بتحبطهم وبتسببلهم قلق وبتخليهم شغالين دايما في جو عدم الإستقرار وجو فيه توتر.. فيضطروا يتعاملوا إما بشكل فيه غشم وقلة ذوق عشان يعرفوا يتعايشوا أو ينسحبوا وينطوا ويحصلهم مشاكل.
المشاكل دي موجودة في أي بيزنس بنشتغل فيه وفي كل انواعه ومفيش حد بعيد عن أنه هو يتحط في المشاكل دي.. للأسف احنا كمصريين عندنا شوية تركات كدة اتعلمناها من صغرنا وبنعملها.. بيقولك لازم تبقى فهلوي بزيادة, لازم تبقى براشوت, لازم تبقى شديد.
طيب اللي مش حابب الجو ده وفي نفس الوقت حابب أنه يحل لأنه شغال وده البيزنس بتاعه ومش كل يوم هدور على شغل ومش كل يوم هيشتغل.
رقم واحد.. اي مكان عشان يبقى ليك قدرتك وقوتك ووجودك فيه وكل الناس تحترمك وتحبك أنك تكون شاطر في شغلك.. شاطر فعلا مش فهلوي يعني تكون عارف كل تفاصيل الشغل بتاعك كلها.. أي شغلانة انت بتشتغلها بقى.. أنا مش بتكلم عن المدير دلوقتي أو الموظف ولا الأوفيس بوي.. كل واحد فينا عارف شغلته ايه بالظبط وعارف بدايتها ونهايتها.. عارف ايه تفصيلتها الصغيرة وعارف ايه هي الحاجات اللي تقدر تنجحه فيها.. أي بيزنس في الدنيا وأي شغل في الدنيا وأي شركة في الدنيا لو أنت اشتغلت وكنت قوي وناجح تأكد إن كله هيمسك فيك بإيده وسنانه.. تاكد أنك هتبقى بالنسبالهم الفرس الكسبان أو فرس الرهان.
يعني أنت لو اشتغلت أوفيس بوي في مكان ببساطة كنت نضيف ومطبخك نضيف وبتعمل عصاير حلوة وقهوة ممتازة وبتقدمها في الوقت سريعا وبتبتسم للعميل وبتتعامل مع المدير بتاعك بشكل شيك مش هيفرطوا فيك, لو أنت موظف ليك مواعيدك ومنظم مكتبك وبتعمل الشغل بتاعك الخاص بالكمبيوتر أوبتأدي شغلك بكفائة ويسر وسهولة ولو اتطلب منك شغل بتبقى موجودة دلوقتي, لو انت مدير وبتكسب الشركة دي وبتعين صح وبتختار موظفين مميزين ذات كفائة عالية بينجحوا الشركة وبيدخلوا ليها دخل هتلاقي الكل ماسك فيك بإيديه وسنانه.
أنت اللي تقدر تعمل لنفسك الإحترام.. لو أنت حطيت لنفسك زي مابيقولوا كدة قالب معين من التعامل إن كل الناس يتعاملوا معاك بإحترام هتقدر حتى لو كنت شغال في أي مكان.. خد بالك أنت كشخص ممكن يكون ليك هيبة بطريقة تعاملك.. شوف ازاي ممكن الناس تتعامل معاك وشوف طريقة استقبالك للحاجة.. يعني مثلا متقعدش ترغي كتير متقعدش تقول نكت كتير وبعدين لما الناس تاخد عليك تلاقي نفسك مش عارف تتصرف ازاي.. مطلعش نفسك ثغرات في الشغل وتلاقي نفسك خايب في شغلك وبتيجي متأخر هتلاقي العصفورة اشتغلتلك.
أنت حط لنفسك الكرير اللي انت عاوزوه.. اتعامل بجد واجتهاد وبإخلاص ربنا سبحانه وتعالى هيوفقك.. هتتنقل من الشغل ده لشغل أحسن, هيعلى الكرير بتاعك ومرتبك هيزيد وهتكون افضل.. دايما شوف انت عاوز تروح لفين واتحرك في الإتجاه اللي أنت عاوز تكون واصله.. متبقاش بتحلم بشيء وأنت واقف في مكانك وبتجري جري في المكان.. لو عاوز تجري اجري لقدام مش تجري في مكانك وتقول أنا بجري أهو.. أنت كدة بتتعب على الفاضي.
ركزوا يا جماعة لأن الأمور دي ممكن تكون بسيطة لكن بتفرق كتير معاكوا.
تحياتي ليكوا.. وان شاء الله دايما بالتوفيق.. السلام عليكوا...
By Mohamed Elmahdy
للإستماع إلى الفيديو لهذا الموضوع اضغط هنا
لمتابعة القناة على اليوتيوب اضغط هنا
ولمزيد من المعلومات عن طرق النجاح اضغط هنا
موضوعات ذات صلة:
كل ما يخص التنمية البشرية اضغط هنا
.jpg)
Copy Right 2018
