احنا بنتكلم هنا فى موضوع يمكن مش واضح عند كتير خصوصا اللى بيشترى شقة او عقار فى التجمع الخامس والقاهرة الجديدة او اراض او فيلا وخلافه خلينا نعرف انواع شركات العقارات دى ونتكلم عن مميزاتها وعن عيوبها
النوع الاول شركات اونر او شركات مالكة
ودى هى الشركات المالكة للمشروعات فى شركات راس مالها كبير وعالى علشان تمتلك كمبوند مثلا او مول هيتبنى سوا تجارى او ادارى او تمتلك اراضى عمارات او اراضى فيلات هتبنيها شقق عمارات او شقق فيلات وفى شركات راس مالها اقل شوية بيكون عندها 4 او 5 مشاريع وخلاص
مميزات النوع دا من الشركات
- بتعمل حملات اعلانية كبيرة وبتصرف فى الدعايا على اكبر من جهه مثل اوت دور او راديو او حملات الفيس بوك او انستجرام
- المشروعات بتكون ملكها يعنى بتكون متحكمة فيها وفى مواعيد التسليم
- روح الشغل بتاعها واحد وبتكون ثابته على نظام معين فى المبانى مثلا مودرن او كلاسك او ميكس وهكذا
- لو موجودة بقالها فترة هتكون سمعتها معروفة هل بتسلم فى المواعيد
- ادارات مختلفة لادارة الشركات مثل ( ادارة الحسابات - ادارة الشئون القانونية - ادارة المبيعات - ادارة التسويق - ادارة خدمة العملاء - ادارة المشتريات - ادارة التنفيذ والانشاءات - ادارة التراخيص ) وهكذا
- لبس الموظفين بيكون فورمال وبيحرصوا علة مظهر الشركة وموقعها
العيوب
- تركيزها فى منطقة واحدة او اثنين بحد اقصى فى العروض بتاعتها وبالتالى لايستطيع العمل ان يكون لديه فرص اكبر فى الاختيارين اكتر من منطقة يعنى بتكون شغالة فى الكمبوندات فقط او تجارى ومولات فقط او منطقتين عمارات فقط او منطقتين فيلات فقط
- كل شغلها بيبقى تحت الانشاء مفيش استلام فورى فى الغالب
- لو اشترت اراضى كتير اكتر من امكانياتها او طاقتها هيكون التسليم عندها فى مشكلة وهيحصل تاخير فى التسليم
النوع الثانى من الشركات ميكس بين اونر وبروكر بعقود تسويق
يعتبر شركة عندها قطعتين او تلاتة ملكها وفاتحة شركة وكيان وبتحدث فى التسويق فتدور على مشاريع اخرى تزودها من مستثمرين عندهم اراضى وبيبنوا ومش مستاهله يعملوا شركة لقطعة ارض او اتنين ويتم توقيع عقود تسويق بينهم وفى الحالة دى بيزيد المعروض فى الشركة دى
المميزات
- بيزود عدد المشاريع والمناطق اكتر فممكن العمل يكون عنده فرصة اكبر شوية فى الاختيار
- البيع بنظام التقسيط مثل النوع الاول
- ادارات مختلفة مثل النوع الاول
- لبس فورمال مثل النوع الاول
العيوب
- عدم تاكده من ميعاد التسليم خصوصا فى المشروعات اللى بيكون موقع فيها عقود تسويق
- كل شغلهم فى الغالب تحت الانشاء ولو فيه تسليم فورى فى الغالب بيكون ريسيل لعميل اشترى منهم وييبعهوله تانى
- العمولة بتكون مقنعة يعنى العميل اللى بيشترى بيدفعها لانه فى عقود التسويق بيمضى عمولة من 5 الى 7%
- العميل اللى بيشترى بيكون متصور انه بيشترى من شركة مالكه ومش بتكون واضح فى المشاريع اللى بيسوقوها الا وهو بيعمل العقود
- لو دخلوا فى مشاركات كتير فى الغالب برده بيكون عندهم مشكلة فى التسليم
النوع الثالث شركات بروكر بعقود تسويق
ودى شركات بتعمل عقود تسويق مع مستثمرين عندهم اراضى وهيبنوا عليها شقق سواء فيلات او عمارات او عندهم مول او حتى تسويق لكمبوند بس كل دا بعقود تسويق فى الغالب حصرية بمده حدده تعالوا نعرف مميزات النوع دا
المميزات
- متاح اكتر من منطقة وبالتالى بتكون فى عروض للعميل وممكن كمان كمبوندات
- حملات اعلانيه فوق المتوسطة واحيانا كبيرة حسب قوه المشروع اللى بيسوقوه
- البيع بنظام التسهيلات زى النوعين اللى فاتوا
- فى ادارات مختلفة للشركة زى النوعين اللى فاتوا
- برده لبس فورمال للموظفين زى النوعين اللى فاتوا
العيوب
- عدم التاكد المباشر بمواعيد التسليم ومعملهمش مشكلة امام العميل اذا اتاخر المستثمر فى التسليم
- روح التشطيبات عندهم مختلفة وده بسبب اختلاف القائمين بالتنفيذ
- الشغل تحت الانشاء زى النوع الثانى
- العمولة مختلفة برده زى النوع الثانى بيدفعها بطريقة غير مباشرة العميل اللى بيشترى واحيانا تصل العمولات من 5 الى 10% لو مشروع هيتسلم بعد سنتين او 3 سنوات
- العميل اللى بيشترى بيكون متصور انه بيشترى من شركة مالكة
النوع الرابع شركات البروكر العادية وسيط عقارى او سمسار
ودى بتكون شركات فى الغالب مكاتب بسيطة بدون بهرجه كبيرة وممكن يمتلكها فرد واحد فقط عمل شركة او مكتب مع نفسه طب ايه مميزات النوع ده وايه عيوبه تعالوا نشوف
المميزات
- بيشتغل فى جميع مناطق التجمع الخامس فى الغالب وبالتالى العميل هتلاقى عنده (ايجار - اراضى - فيلات - شقق - تجارى - ادارى - صناعى)
- عنده استلام فورى وتحت الانشاء
- بيسوق للجميع سواء شركات اونر او مستثمرين او افراد عادية او بتتعاون مع شركة زيه
- عنده معلومات عن تحميل الشقق ده كتير ولا معتدل لانه بيعمل مقارانات علشان عنده شركات كتير بتسوق معاه وهيكون عارف اصل مساحة الارض وتراخيص المبانى فيها
- بتعرف الاسعار كويسة ولا عاليه وبيعرف العميل افضل الاسعار
- بياخد عمولة من الطرفين وبيكون واضح فى كدا مش خافيه على احد وبتكون من 1 الى 2.5% على اقصى تقدير
العيوب
- ان الشركة او المكتب او الفرد الموضوع مش بيحتاج راس مال كبير فبختلاف ناس كتير بيشتغل بروكر واحيانا كتير منهم مش بيكون عنده خبره ومعلومات دقيقة وتفصيله فى امور هامة مثل الاجراءات القانونية وخلافه
- مش هو مالك العقار وبالتالى لو مش بيحدث الداتا بشكل دورى ممكن تقابله عقبات زى المالك يغير السعر او يكون باع او اجل البيع وهكذا
- للاسف احيانا شركات البروكر بيبوظ شغل بعض فى السوق لو عرفوا ان العميل هيطير منهم بيبوظولوا دماغه بطرق كتيره منها على سبيل المثال ( الاراضى دى مثاليه هنجبهالك بسعر اقل - او ورق الشقة دى مش مظبوط عندى حاجة احسن - او المكتب دا هياخد عمولة منك كبيرة انا مش هاخد خالص وده لانه معاه الطرف التانى مثلا عامل فرق سعر - وهكذا
- مش بيكون في ادارات كتيره فى الشركة على اقصى تقدير ادارة المبيعات و ادارة التسويق فقط
النوع الخامس شركات اتحاد الملاك
ودى طلعت فى الفترة الاخيرة من 3 سنوات مثلا ودى اما شركة وكيان او اتنين تلاتة مهندسين اصحاب عبارة عن ايه النوع دا بتقوم الشركة بتجميع افراد مع بعض مثلا 8 افراد وده ترخيص الشقق مثلا فى عمارة ما وبتشتروا الارض سواء وتبدا الشركة فى ادارة موضوع للافراد دول ونسلمهم الشقق وده بتتكلف اقل من الانواع الاخرى من الشركات
المميزات
- سعر متر الشقة بيقف على المشترى او الشريك باقل ب 25 الى 30% احيانا على الشركات الاخرى
- بخلاف العقد بتاع الشقة او عقد الشراكة بيعمل توكيل بالبيع لحصة المشترى فى الارض
- مكسب الشركة بيكون محدد وواضح فى العقد فى الغالب بيكون من 10 الى 15% من اجمالى التكاليف وده مقابل ادارة المشروعات عن كاهل الشركاء حتى الانتهاء من التسليم
العيوب
- القرعة اللى بتعمل عليها الشقق دى يعتبر الشراء بالفعل ودفع الفلوس ودى بيكون انت وحظك يعنى الشقة بتجيلك بظروفها يعنى نفسك فى الدور الاول ممكن تلاقيه الثالث وهكذا
- او حدث اى تغيير فى اسعار مواد البناء يقوم المشترى بتحمل الزيادة الطارئة
- ان يكون تحت الانشاء مش استلام فورى
- نظام الدفع بيكون اصعب فى التقسيط عن الشركات الاخرى يعنى فى الاول ممكن تدفع ثمن الشقة 35 او 40% لانك بتدفع ثمن الارض فى الاول وبيكون كمان عليها اقساط مش 10 او 20% زى الشركات التانية وبتدفع اقساط اثناء البناء لحد الاستلام تكون خلصت ثمنها لو على الارض فلوس للحكومة بقسطها بس يكون ميلغ بسيط جدا عكس الشركات الاخرى ان ممكن تفضل تقسط بعد الاستلام سنتين او ثلاث
ختامه ارجو ان اكون قد اوضحت انواع الشركات بشكل مبسط يصل لجميع من يرغب فى معرفة هذه النقط وشكرا لجميع متابعى موقع التجمع الخامس .com او قناه اليوتيوب الخاصة بى تحياتى للجميع
كتب بواسطة / محمد المهدى
.jpg)
